Khamis, 25 September 2008

Kenangan Raya Versi Banjar


Bahari tu litrik kadida lagik. Kada batalibisin. Radio gin makan bitri basah cap kucing, ampat sagi. Macam wayahni la jua, balagu raya, Saloma, P. Ramlee, Ahmad Jais bagantian banyanyi lagu raya. Kami ni sibuk pang manabas halaman, bagunting rambut, manukar baju hanyar macam urang ngai jua.

Baju cap 007 kasut betel plastik. Salawar tu bilng lundih di bawah pusat, katat pulang tu. Musimnya kaitu. Balah malamnyak tulak ke surau, sembahyang tarawih  nyak setumat jua, main marcun banarai yang labih. Yang taganal tu, baulah mariam buluh. Kakanakan damini kada suah mandangar marcun kada sarantian macam bahari.

Halaman tu mun kada ada bakas marcun, kada bakakanakan la rumah tu. Kami balawan tabal bakas marcun. Ading yang haloi main mariam cuntang. Tanah ditabuk hagan maise kat wan sikit banyu, imbah tu tudungi wan cuntang, imbah tu cucuh, napang malacung cuntang tu naik ke atas. Bahari kada suah tadangar urang putus tangan main mariam buluh.

Uma wan kakak di rumah sibuk babanam bahulu, arom baunya, guriakan parut, puasa kada tinggal. Pantang kina ada haja yang bajual es buku pakai habok papan di kadai. oreng, sarsi, lici, cendol dan macam-macam pang jualan. 

Malam, semua rumah badamaran, yang tabisa sikit tumaulah damaran bintang digantung di ambin. Balawan babanyakan damaran pang. Mun kadida damaran, kada sah.

Bah, malam itu imbah haja radio madahkan raya, galaduaian mariam wan marcun. Yang main bunga api gin di batas bilang haja ah lagi. Kad raya yang bergirapan digantung di dinding. Malam tu kakak malubi baju pakai harang pang, baju tu bakanji, mancarungit sait. Adoi! luka jar kawanan mahuluti. Asa kada mau taguring pang malam tu mahadangi subuh.

Yes!! esok raya!!...

2 ulasan:

Anuar Manshor berkata...

Kenapalah aku tak faham walaupun bapa aku Banjar. Maknanya aku Banjar jugalah kan.

ZulDeanz berkata...

Kira ada keturunan Banjar laa tu sdr. Anuar..